Sunset Beach: Perlemoen ná wenk gekry_ en ik te laat op het strand...

KAAPSTAD. – Die polisie het ná ’n wenk van die publiek in Table View op die strand beslag gelê op 1 660 perlemoene met ’n markwaarde van R400 000.
Insp. Kenneth Lombard, ondersoekbeampte, het aan Die Burger gesê die vinnige reaksie van die gemeenskap het tot die beslaglegging gelei. “Dit is die grootste hoeveelheid perlemoen ooit waarop die polisie tussen Dolphin- en Sunset Beach beslag gelê het.”
Volgens Lombard kom perlemoenstropers “met moord weg” omdat daar geen kuswag-patrollies naby dié gebied is nie.
Me. Carol Moses, woordvoerder van die departement van omgewingsake en toerisme in die Wes-Kaap, sê die beslaglegging weerspieël die sukses van die departement. “Die strukture wat deur die departement in plek gestel is, verseker dat stropers in hul spore gestuit word. Die inligting wat die gemeenskap aan ons gee, verseker dat perlemoenstropery tot ’n einde kom.”
Supt. Billy Jones, polisiewoordvoerder, het aan Die Burger gesê ’n man is vir ondervraging aangehou, maar is later vrygelaat. “Hy kon nie met die perlemoen verbind word nie, maar daar is wel dagga op hom gevind. Die man is gistermiddag vrygelaat nadat hy ’n boete betaal het.”